Olar alǵashqy kúni Qostanaı men Rýdnyı qalalaryndaǵy iri kásiporyndaryna uıymdastyrylǵan týrǵa qatysyp, áıgili Sokolov-Sarybaı ken óndirý birlestiginde, «Jas qanat-2006» qus fabrıkasynda, «Baıan sulý» kondıter fabrıkasynda, «SaryarqaAvtoProm» mashına jasaý zaýytynda, Qostanaı kartıng ortalyǵynda, «Nurly jer» baǵdalamasy boıynsha salynyp jatqan shaǵyn turǵyn aýdanda boldy. Forýmda syrttan kelgen bıznes ókilderine Qostanaı oblysynyń ınvestısııalyq qýatyn kórsetý maqsat etip qoıyldy.
«Biz irgeles el bolsaq ta Qostanaı oblysynyń óndirisin kózben kórmegen edik. Forým endi oblys ónerkásibimen jete tanysýǵa múmkindik berdi. Eki jaq eń aldymen tájirıbe almasady, birlesip jumys isteýdi bastaıdy. Bizdiń qostanaılyqtarǵa óz salamyzdan, ıaǵnı energetıka salasynan usynystarymyz bolady», dedi Ekaterınbýrgten kelgen kásipker Rýslan Starınskıı.
«Kostanay Invest–2017» forýmynda ekonomıkanyń aýyl sharýashylyǵy, kenmetallýrgııalyq, mashına jasaý jáne týrıstik tórt salasynan Qostanaı oblysynyń ınvestorlyq múmkindigi qaralady.
«Aýyl sharýashylyǵy – forýmnyń ózekti taqyrybyna aınalady. Qostanaı oblysy – astyqty óńir. «Kostanay-Invest 2017» forýmy alys-jaqyn elderden kelgen kásipkerlermen oblystyń ınvestısııa tartý múmkindigi týraly talqylaıtyn bolamyz. Jyl basynan bergi 8 aıda eknomıkany damytýǵa tartqan ınvestısııa kólemi aldyńǵy jyldan 11 mıllıard teńgege kóp. Bul oblystyń ınvestısııalyq qýatyn kórsetedi» dedi Qostanaı oblysy ákiminiń orynbasary Meıirjan Myrzalıev.
Sonymen qatar, forýmnyń alǵashqy kúni reseılik Arman Holding kompanııasynyń negizin salýshy qandasymyz Serikbaı Bısekeev «О́zińdi óziń jasa» taqyrybymen ashyq sheberlik sabaǵyn ótkizdi.
Názıra Járimbet,
«Egemen Qazaqstan»
QOSTANAI
